الزين التلمساني

هده الصور إلتقطتها من مدينة ندرومة في حفل إفتراضي في إطار ملتقى عبد المومن بن علي 

 

الـــزيـــن الــتـــلـــمـــســـانـــي

                          أه يا تلمسان فتنتينا بالزين 

 

لعلك سمعت عن الزين التلمساني و بدأت تتخيل أين يكمن هدا الزين  و أين يوجد و كيف هو , أسئلة تتبادر إلى الأذهان و تحاول أن تعرف خباياها .

الزين التلمساني و هو زين رباني أعطاه إلى هده المدينة الجميلة كما غنى به المطرب و الفنان الحاج محمد الغفور و يقول في غناه : إن الله جميل و يحب الجمال فكيف عبادك لا يعشقون .

تلمسان شابة في كل شئ في مظهرها و في طابعها المعماري حيث بناءها يعشقها كل زائر لها .

تلمسان زينة في أولادها و شيوخها و تلحيفة نساها ترى فيها الجمال يشرق في وجوه فتياتها .

تلمسان حنينة تحن على كل واطئ أرضها لا تبخل عن أي طالب يدها  و يسكن بها كل راغب في المكوث بها .

تلمسان العلم فيها العلماء أجلاء تركوا بصماتهم و سكنوا بها  و ضحوا من أجلها و أعطوا كل ما يملكون من أجلها.

تلمسان فيها سيدي بومدين عساس عليها و هو في رأس الجبل يضوي عليها بالنور و بدعواته الكريمة .

تلمسان ديك الصومعة العالية من بعيد تبان صومعة منصورة أثار يحفظ سكانها من البلاء.

تلمسان فيها لالة ستي ضاوية في كل أوقات يزوروها كل الزايرين ليها و فيها القعدة تحلى خاصة في رمضان .

تلمسان فيها الأقادير معروفة من زمان يذكرها الناس بالخير و هي اللي فيها تاريخ طويل يحكي عليه العالم و لا يمل من هده الحكاية .

تلمسان فيها التقاليد راسخة ما بين ناسها فيها طبوع و غنى الملحون و الحوزي و الأندلسي يطرب الأذان فيها العربي بن صاري و فيها بن الزرقة خلا الآثار و فيها القلال و العيساوة و أولاد نهار و فيها و فيها ... و فيها الشعر و الشعراء فالملحون و الفصيح يصدح صديح فيها محمد ديب خلا البيان .

تلمسان فيها الحرفة و فيها التقليد من عهد زمان فيها النحاس         و السرج و النسيج به معروفة و البلغة و المشطة و الشمع اللي ضوى عليها فيها اللباس التقليدي و القفطان العروسة به معروفة و الشدة تزين الغزالة و الحنة فاليد مرسومة فيها الذهب من غيره ما يقبلوا ناسها العربون . .

تلمسان فيها الفرحة فرحة عرسها مين يدخل العريس بالعود و الطبل و الزرنة أه شحال تحلى ديك النظرة و الناس ترقص مع الإخوان .

تلمسان فيها الطبخ التقليدي معروف فالبلدان الطعام كل جمعة في كل دار الحريرة ما تشبعها و طبق الحمص بالبدنجان و البايلة فوق المايدة محطوطة فيها الحلويات التقليدية من الكعك به مشهورة و المقروط    و الكريوش و الصامصة الشاي بلا هادوا ما تحلى القعدة .

تلمسان فيها الكلام بالهمة فيها الآلة تخرج من الفم مرسومة ما تجبر مثلها فالبلدان الشيخ يقولوا له سيدي و الحرفي يقولوا له المعلم       و الفنان يعطوا له مول الصنعة و القيمة تجبرها حتى عند الصغار.

تلمسان المدينة عندها أولادها تلمسان صغار دايرين بها عندهم من كل حويجة حاجة , تجبر سبدو بتقاليدها مشهورة و تجبر أولاد ميمون تحرس المحروسة .و تجبر مغنية و مرسى بن مهيدي فيها الغيوان    و تجبر البحر فالغزوات و ندرومة حتى هما بالآلة و الفن و الثقافة ما تتغير على مدينة تلمسان , فيها الرمشي و الحناية قريبة .

أه يا تلمسان فتنتينا بالزين جمال معروفة من هادوا سنين فيك من كل أصبع بصنعة منك خرجت الحرفة مشهورة بك يضربوا المثل فالثقافة  و العلم و الجمال .

تلمسان فيها الكنوز مكنوزة إدا حبيت تعرف خصالها أسأل ناسها      و أسأل البراني اللي عايش في أحضانها .أه شحال شابة يا تلمسان .