قصيدة ملحون ثلاثية الأبعاد

رانــي مــغــلــوب

          رانـي مـغـلـوب يـا سـيـادي           فـي زماني ما لـقـيـت حـل

   عـيـيـت صابر للـضـر واعـر

                 غـبـنـوني زادوا في عـذابـي          لا صاحب للـعـقوبى راجـل

            فالمحاين نتعاونوا عـلى الـشـر

                  الراس عامر و الجيب خاوي     الـدنـيا عـطات غير للجاهـل

                                     الـفـتـنـة قوات فالـبر و البحـر

                  الحـرام في كـل مـكان يـنادي         داروا له قدر و ردوه حلال

               تغـيـر الحال و عـطاني بالظهر

                  ما بـقـا خـيـر لجـواد جـوادي          لا عـرضا لا طـعـام يـنـفتل

               لا خـو ينصاب لا جـار يـنجـبـر

                  الـحـرما غـابـت مـن عـيـونـي       مـشـات مع مـواليها يا العاقل

                 تـنـذب عـلى بنادم كيفاه يـتـكـبـر

          ولى المهبول يضرب المعاني        و الجاهل ولى يصول و يجـول

  دخل رجليه و راسو ولى يسيــًر

          تقول الناس راهم يصلوا للربي       حامليـن الإسـلام بـدون عـقـول

  حـيـلـة غــش بـهـــــتـان و زور

          يصلوا صلاة القياد ديرينها بالعاني     المنكر واقع و الشر داير ظلال

                              لا ملـّة لا دين لا عبادة تنذكر

          كثر المرض و زاد العيب في بلادي    لا حشما بقات لا معاني بقوال

                               لا صوم نيشان لا زكاة بالقدر

          كل الذنوب و زيد العيوب قبالي         و يقول راني فالإسلام نمثل

                                الـحـقـرة و زيـد شـرب الـخمر

          نـسـاو الأخـيرة و تـبـعـوا الـفـاني         شهروا القاورية ردوها غال

                                تلفوا العربية دفنوها في قبر

          النسا تعراو دخلوا في وسط الغاشي      رجعوا اولاد لبسوا السروال

                                 زوقوا ارواحهم و قصوا الشعر

          حـقـك مـشـا فـالـمـيـزان يا خـوتـي      ما يخافوا ربي يفصلك تفصال

                                نسرقك و نضربك بلاك إلى تهدر

         من صلة لرحام حتى حد ما راه مهني    كثر الحـرام و فـنا ولـد الأصل

                                العايلة مشات عليها يبقى الخاطر

         الـشـبـعـان ما يـفـكـر فـالـجـوعـانـي       يحسدك و يعاندك حتى فالأكل

                                 خوك يبدلك بعدما يزيد عليه الخير

         كـثـر هـمْ الـناس ولات غـيـر تجري     لا صح لا فايدة من غير المال

                                 المال يعـلي و يعـمي و يدي للـنـار

         الله يـهـدي و يـقـرب ما بيـن لخواني      ما تـدوم الـدنـيـا ما يبقى حـال

                                  اسـتغـفـر مـولاك و قـول الله يستر