بـــغـــيـــت نـــولـــي
عـــربــــي
فالأصل أنا عربي
ما ندرك الشمس بالغربال
أصلي و نسبي مالناس العربان
من بكري جدودنا شجعان
كانت عندهم الكلمى و الشأن
عربي كلمة نابتة من القرآن
لكن كيفاه نكون عربي
لابد علي نقبض الطريق نيشان
نخدم بالنية
ما نغش و ما ندير الحيلة
و نفرق ما بين الحلال و الحرام
على هذا بغيت نولي عربي
العربي كان حربي
فيه الخصلة و النيف
ما يكذب ما يعادي خوه
ما يغش فالميزان
متربي بدين الإسلام
متخلق بأخلاق الرجال
رجال أحرار خلاو الأثار
شوف هذاك البنيان
من بعد تسع قرون و مازال
كان عربي و يخمم فالأجيال
الكلمة في بلاصتها
ما يخاف من العديان
ما يخالف ما يخون
على هذا أنا بغيت نولي عربي
بصح باه نولي عربي
ما نحقر و نكون رقبة
ما ندل روحي نولي مثل النسوان
نعرف قدري نحشم إذا درت العار
نصلي صلاة الثابت
خاشع في صلاتي
و نطبق واش جا فالفرقان
نتواضع إذا مشيت
نتكلم بحديث مثين
نساعد المسكين
ما نتكبر و نكون حنين
الحسد مكروه و البغض حرام
عيش مع جارك بالإحسان
على هذا أنا بغيت نولي عربي
كنا قبايل و ما زلنا حنا قبايل
سميني قبايلي
عيط لي شاوي
قول لي مزابي و لا ترقي
لكن حنا بربر عربنا الإسلام
أمة وحدة من المغرب حتى لليمن
أصل البربر رعب
ما كانوا يخافوا من الحرب
على وطنهم داروا المحال
خرجوا الاستعمار
توحدوا في وقت الشـّدة
جزايري حرّ في بلادي
و ندير مثل الثوار
الإيمان ساكن في قلبي
على هذا أنا بغيت نولي عربي
و باش يعرفوني بلي أنا عربي
نزرع باش ناكل
و ننسج باش نلبس
نصنع الصح في بلادي
نعتمد على نفسي و نزيد أولادي
نتعلم العلم للي يفيد
نقرى علوم لجواد
صنعى و تقليد فاليد
نحافظ على تراث بلادي
نـْصفي ذاتي من الخبث
نطيع الوالدين و نقادر الكبير
ننصح الصغير بالخير
و ندير الخير قبل الشر
هكذا كانوا جدودي
بعد زمان و زمان يجي الغيث
و بهذا الشئ نكون عربي
نمثل العرب في لباسي
ما نتبع الغير ما نكون حقودي
حسن السيرة ما بين الأمم
هكذا يعرفوا أصولي
و نبقى عربي للدايم لدوام
